Batys Qazaqstan oblysynyń barlyq medısınalyq mekemeleri qaǵazsyz qujat  aınalymyna kóshti. Batys Qazaqstan oblystyq densaýlyq saqtaý basqarmasynyń baspasóz hatshysy Aınagúl Saqposynovanyń aıtýynsha,  BQO perınataldy ortalyq «Júkti kelinshekterdiń forýmy» atty mobıldi qosymsha daıyndaǵan. Qazirgi tańda qosymsha testtik rejımde tekseristen ótip jatyr. Bul qosymsha arqyly júkti áıelder gınekolog dárigerlerdiń keńesin úıden shyqpaı-aq ala alatyn bolady. Oǵan qosa qosymshada kóptegen paıdaly keńester engizilgen. Sondaı-aq Oral qalasyndaǵy  emhanalarda «Qazmedınform» medısınalyq aqparattyq júıesi men «Elektrondy kezek» jumysy jaqsy jolǵa qoıylǵany málim. Oblys kóleminde k-vrachu.kz mobıldi qosymshasy jumys jasaýda. Ony Play Market pen AppStore-dan telefonǵa nemese planshetke júktep alýǵa bolady. Bul mobıldi qosymshanyń kómegimen paıdalanýshylar úıden dárigerdiń qabyldaýyna jazylyp, qońyraý shalýǵa, jazylǵan reseptilerdi, zerthanalyq zertteýlerdiń nátıjelerin kórýge múmkindik aldy.

Batys Qazaqstan oblystyq klınıkalyq aýrýhanada da  medısınalyq aqparattyq júıesi eńgizilip, tirkeýden bastap naýqasty shyǵarýǵa deıin tutastaı qaǵazsyz proseske kóshti. Bul aqparattyq júıe barlyq medısınalyq uıymdarmen onlaın rejıminde baılanys ornatýǵa múmkindik beredi. «Qazmedınform» medısınalyq qatelerdiń sanyn azaıtýǵa, medısınalyq kómektiń úzdiksizdigin qamtamasyz etýge, medısınalyq qyzmetterdiń sapasyn jaqsartýǵa  múmkindik beredi.

Qalalyq №1 emhanada aýrýdy basqarý baǵdarlamasy (PÝZ-programma ýpravlenıa zabolevanıem) iske qosyldy. Sonymen qatar qant dıabetine shaldyqqan naýqastardyń kóz aýrýlaryn aldyn alý jáne baqylaý úshin arnaıy Peek Retina qurylǵysy satyp alyndy. Ol arqyly jalpy tájirıbe dárigeri naýqasty kóz dárigerine jibermeı, qurylǵyny telefonǵa ornatyp, kózdi ózi fotoǵa túsirip, aqparattyq júıege engizedi.